شهریار سایتینین خبرینه گوره، تبریز بلدیه رئیسی بو گوروشده ثمینه باغچه‌بان ایله گوروشوندن چوخ راضی اولدوغونو بیلدیریب دئدی: سیزین تهراندا اولدوغونوزو ائشیتدیکدن سونرا، سیزی گورمه‌یه گلمه‌یی اوزومه بورج بیلدیم. سیز و عزیز آتانیز جبار باغچه‌بان، تکجه تبریز تاریخینده دئییل، آذربایجان، ایران و حتی دونیانین تاریخینده اوزل بیر یئر توتورسوز.
او علاوه ائتدی: جبار باغچه بان ائشیتمز اوشاقلار اوچون مدرسه قورماقلا، توپلومون بو قروپونون تعلیمی‌نده بیر اینقلاب یاراتدی و تبریزین آدینی دونیادا تانیتدی. بو افتخار تبریز و ایران اوچون همیشه قالاجاق.
هوشیار، تبریزنین اوزل خوصوصیتلرینه ایشاره ائدیب دئدی: تبریز همیشه ایلک‌لری یاراتماقدا اونجه گدن بیر شهردیر و سیز و بویوک کیشی جبار باغچه بان بو یولدا اونده گئدن لردن ایدینیز.
او علاوه ائتدی: تبریز بو جور بویوک و تاثیرلی شخصیتلره افتخار ائدیر و همیشه تاریخینده آتانیزی بیر بویوک افتخار اولاراق خاطیرلایاجاق.
تبریز بلدیه رئیسی داها سونرا ثمینه باغچه‌بانین "تبریزین زنده نامان" پروقرامیندا تقدیر ائدیلمه‌سینی تکلیف ائتدی و دئدی: تبریز اوزونون مدنی فضاسی ایله سیزین اوچون انرژی و ایلهاملا دولو بیر یئر اولا بیلر.
او، خانم باغچه‌بان‌دان تبریزه گلمک و بو احتشاملی پروقرامدا اوندان تقدیر ائدیلمه‌سی اوچون دعوت ائتدی.
داها سونرا، هوشیار، ثمینه باغچه‌بانین "گلین تورکجه دانیشاق" آدلی کتابینین تبریزده چاپ اولونماسینی تکلیف ائتدی کی داها چوخ اوخوجو بو ماراقلی و طنزله دولو اثریندن فایدالانسینلار.
او بو باره‌ده علاوه ائتدی: تبریز، ایلک‌لر شهری‌دیر، بو شهرین ایلک‌لریندن بیرینین قیزی اولاراق، کتابینین دوغما شهرینده چاپ اولونماسی بیزلری سئویندیرر
ثمینه باغچه‌بان دا بو ده‌یَرلی گوروشدن چوخ شاد اولدوغونو بیلدیریب دئدی: بو گوروش منیم اوچون تاریخی و روحیه‌وئرن بیر گوندور. تبریز همیشه منیم اوچون خاطیره‌لی بیر شهردیر و بو گوروش منی آتامین یادینا و آتا یوردونون حسرتینه سالدی.
او علاوه ائتدی: تبریزده و خاصیله عائله‌مین یانیندا کئچیرمیش زامانلار منیم اوچون همیشه ده‌یَرلی بیر خزینه‌دیر.
او تاکید ائتدی: ترکی ادبیاتی خاصیله منیم اوچون همیشه دَیرلی معنادا و عمقلی مفاهیمین منبعی اولوب و ترکی شعرینده انسان عمقلی مفاهیمه و اوزل گوزه‌للیکلره چاتا بیلر.
ثمینه باغچه‌بان ترکی ادبیاتینین همیشه اوزونون اوچون خاص و جذاب معنالاری اولدوغونو بیلدیریب، مشهور ترکی شعرلریندن بیرینی اوزونه مخصوص سس ایله اوخودو: "محبت بیر بلا شئی‌دیر گرفتار اولمایان بیلمز"،
او داها سونرا علاوه ائتدی: "آرزوم بودور کی بیر گون یئنه تبریزه، دوغما شهریمه قاییدام. تبریز همیشه منیم اوچون عشق و خاطیره‌لرله دولو بیر شهردیر.
بو گوروشون سونوندا، تبریز بلدیه رئیسی، ثمینه باغچه‌بانین حیاتی و بویوک آتاسی جبار باغچه‌بانین اَل‌یازیلاری حاقیندا بیر فیلم مستندی چکمک تکلیفی وئردی. بو تکلیف ثمینه باغچه‌بان طرفیندن قبول ائدیلدی.
نظرات