شهریار خبر سایتینین خبرینه گوره، یعقوب هوشیار دئدی: بو هفته‌نین مقصدی تبریز و آذربایجانین مَدنی و اجتماعی ایمکانلارینی تانیتماق و تهراندا یاشایان آذربایجانلیلارین ایمکانلاریندان یارارلانماق‌دیر.
تبریزین بلدیه رئیسی، تبریزین مدنیت هفته‌سی‌نین ۲۲-۲۹ بهمن آیینین آراسیندا تهراندا کئچیریله‌جگینی و بو هفته‌نین مقصدی تبریزین مَدنی، هنری و اجتماعی ایمکانلارینی اولکه سَوییه‌سینده تانیتماق اولدوغونو بیلدیردی.
بلدیه رئیسی، تبریزین تاریخی و مَدنّی موقعیتینه ایشاره ائدیرک دئدی: تبریز قدیمدن بَری مَدنی و هنری ساحه‌لرده بیرینجی و اونده گئدن بیر شهر اولوب و مختلف قوروملار طرفیندن بو ایمکانلاری آرتیرماق اوچون اونملی ایشلر گورۆلوب. آنجاق، هله ده اولکه سَوییه‌سینده داها یاخشی و گئنیش شکیلده تانیدیلماغا احتیاجی وار.
او بئله علاوه ائتدی : تبریزده اولان ایمکانلارلا یاناشی، تهراندا یاشایان تبریزلیلر و آذربایجانلی نوخبه‌لر و تاثیرلی مَدنّی و اجتماعی شخصلر، بو پروقرامی گوجلَندیرمک اوچون دَیرلی بیر فرصتدیرلر.
هوشیار اوز سوزلرینین باشقا بیر حیصه‌سینده دئدی کی، دکتر مسعود پزشکیانین جمهور رئیسی و دولتین باشیندا اولماسی تبریز اوچون بویوک بیر ایمکاندیر و بو ایمکاندان نئجه یارارلانماق آذربایجانین ایداره‌چی‌لرینین چالیشماسی و دقیق چالیشمالارینا باغلی‌دیر.
هوشیار دئدی: مدنی اساسلار اقتصادی و اجتماعی ساحه‌لرده اینکیشاف اوچون زمینه ساخلایا بیلر و تبریزین مدنیت هفته‌سی ده بو چارچووادا تعریف اولونوب.
تبریزین بلدیه رئیسی بو هفته‌نین اونملی هنری قروپلاری‌نین ایشتیراکی ایله کئچیریله‌جگینی بیلدیردی و دئدی کی، بو میلّی هفته اوچون مختلف مَدنّی، اقتصادی، اجتماعی و هنری ساحه‌لری اوزونده بیرلشدیرن چئشیدلی محورلار تعریف اولونوب.
او، شرقی آذربایجان ایداره‌چی‌لرینین بو میلّی هفته‌یه دَستَک اولدوغونو بیلدیردی و رهبرین آذربایجاندا کی نماینده سی تبریزین امام جمعه سی حجه‌الاسلام و المسلمین احمد مطهری اصل و شرقی آذربایجانین والیسی دکتر بهرام سرمستین ده بو پروقرامین، تبریز و آذربایجان شانینا لاییق اولاجاق شکیلده حیاتا کئچیریلمه‌سی‌نین اهمیتی‌نی ورغولادیقلارینی بیلدیردی.
هوشیار بوتون مدنی ساحه ایله باغلی قوروملارین اوز ایمکانلارینی تانیتماقلا بو هفته‌ده اونملی بیر رول اویناماسی گرکلی اولدوغونو بیلدیردی و بو هفته‌نین تبریز و آذربایجانین مدنی ایمکانلارینی اولکه سوییه‌سینده تانیتماق اوچون اوغورلو بیر نومونه اولاجاغینا اومودلو اولدوغونو بیلدیردی.
نظرات