شهریار سایتینین خبرینه گوره، تبریز بلدیه رئیسی یعقوب هوشیار آذربایجان شرقی والیسی بهرام سرمست ایله گوروشده بو باره‌ده دئدی: بوتون شهری مسئوللار اوز تخصص ساحه‌لرینده فعال‌دیرلار و خالقین ایحتیاجلارینی ان یاخشی شکلده گئجه - گوندوز دئمه دن داواملی اولاراق اوده‌مک اوچون چالیشیرلار.
او، دکتر مسعود پزشکیانین جمهور رئیسی سئچیلمه سینی آذربایجان شرقی اوچون تکرار اولونماز بیر فرصت بیلدیردی و بلدیه ایله والیلیک آراسیندا ایش بیرلیگینین اهمییتینی و بو ساحه‌ده بلدیه نین تماما حاضیرلیغینی بیلدیردی.
هوشیار سون اوچ ایل ایچینده تبریز بلدیه بودجه‌سینین آرتماسینا ایشاره ائدرک دئدی : بلدیه بودجه‌سی آلتینجی دوره شوراسی باشلانیش زامانی ۵ مین میلیارد تومندن ۳۰ مین میلیارد تومنه آرتیب و هر ایلین بودجه‌سی اوچ ایل ایچینده یوزده یوز حیاتا کئچیریلیب.
او، همشهری لرین ساغلاملیق ساحه‌سینه دقت ائتمه‌نی بلدیه نین اساس اولویتلریندن بیری اولاراق گوستردی و دئدی: محلول داغیتما پروژه‌سی‌نین اجراسی ایله ایلده ۵۰ مین تن دوزون داغیدیلماسی آرادان قالدیریلیب و بو ایش همشهری ارین ساغلاملیق وضیعتینده گوزه گلن تاثیر قویوبدور. همچینین بو ایلین باشلانقیجی ایله کمپوستین تولیدینه باشلانیلماسی ایله بلدیه طرفیندن ۱۵۰ میلیارد تومن لیک کود آلماغین خرجی آرادان قالدیریلیب.
بلدیه رئیسی عمومی نقلیه واسیطه‌لرینین یئنیلنمه‌سینه ده ایشاره ائدرک علاوه ائتدی : سون ۱۰ ایل ایچینده تنها ۵۰ اوتوبوس آلینمیشدیر، آنجاق آلتینجی دوره شوراسی زامانی ۴۵۰ اوتوبوس آلیش قرارداشی باغلانیب و ۳۰۰ اوتوبوس دا تحویل آلینیب.
او همچینین اوتوبوس ناوگانینین عمرینی ۱۴ ایلدن ۷ ایله آزالتماسی و تبریزین کوهنه و چوروموش تاکسیلرینین یوزده۵۰ سینین یئنیله‌مه‌سی، بیرینجی مترو خطینین تکمیل اولونماسی و ایکینجی مترو خطینین گوزه گلیر ایره‌لیله‌مه‌سینی بو مدتین باشقا نتیجه‌لریندن سایدی.
هوشیار تبریزده ۶۰۰ هکتار یاشیل ساحه‌نین اینکیشافی هدفی‌نین اولدوغونو قئید ائدرک دئدی کی، بو هدفدن ۲۵۰ هکتاری حیاتا کئچیریلیب و گله‌جک ایله قدر هر نفره عاید اولان یاشیل ساحه‌نین ۳ متر مربع آرتماسینی امید ائدیریک.
نظرات