شهریار سایتینین خبرینه گوره، یعقوب هوشیار تبریز شهر شوراسینین ۲۲۹-جو جلسه سینده، ترافیک تصادفوندا اولن ایشچی عاییله‌سینه باش ساغلیغی وئریب، دئدی: شهری خدمت قایدالاری اساسیندا ایشچیلر و خصوصا تمیزلیک ایشچیلرینه ایش زامانی ایمنی حاقّیندا لازیم اولان تدبیرلر و احتیاطلار اویره‌دیلیر.
او، دوردونجو بولگه بلدیه سینین تمیزلک ایشچی سی سجاد کبیری حاقّیندا باش وئرن حادثه‌یه ایشاره ائدیب و دئدی: محکمه‌نین متخصص لریینین (کارشناسلارینین) آراشدیرمالارینا گوره بو حادثه سرعت لاینی نین اولدوغو یئرده باش وئرمه‌ییب و ماشین سوروجوسو چوخ یوخاری سرعتله حرکت ائدیب.
تبریز بلدیه رئیسی کئچن ایل یول تصادفلری نتیجه‌سینده ۱۲۰ نفرین اولدویونو خاطیرلادیب بئله دئدی: شهر ایچینده اولان اولومله نتیجه‌لنه‌ن تصادف لرین %۸۰-ی ماشینلارین یول سرعتیندن داها چوخ سرعتله حرکتی نتیجه‌سینده اولور؛ ائله بو تصادف نتیجه‌سینده اولنلرین %۷۰-ی سوروجولرین اوزو و %۳۰-ی پیادالار و عادی همشهری لر اولور.
او داوام ائدیب کی، یاخین اوچ ایلده یول ترافیکینی کنترل ائدن ترافیک دوربون لرینین سایی آرتدی و بلدیه ایشچی لری ایله باغلی اولان تصادف ده، حادثه یئریندن قاچان سوروجو، خیاوان لار و کوچه‌لرین ترافیک تصویرلرینین تفتیش ائدیلمه‌سی نتیجه‌سینده اله کئچدی.
هوشیار دانیشماسینین باشقا بیر بولومونده آز سایی‌دا اولان قانونلاری سایمایان سوروجولردن دانیشیب و دئییب کی، تبریز بلدیه سینین تکلیفی ایله بلدیه طرفیندن محکمه یه بیر مکتوب گوندریله‌جک و بو مکتوبدا قایدا پوزان و یولدا سرعتی آشان ماشینلارا قارشی قانونون داها محکم و سرت تطببق ائدیلمه‌سی و بو ماشینلارین توقیف ائدیلمه‌سی ایسته‌یه‌جک.
او دئدی: تکجه تمیزلیک ایشچیلرین یول قازاسی نتیجه‌سینده اولمه‌سی دئییل، بلکه همشهریلرین ده یول حادثه لری نتیجه‌سینده اولمه‌سی ده چوخ پیس بیر حادثه‌دیر و قانون قوروملاری اولنلرین سایی‌نین آزالماسی اوچون داها سرت و محکم قانونلار یازمالیدیرلار.
تبریز بلدیه رئیسینین سوزلرینه گوره، گلن ایل تبریز بودجه سینده ۱۲ مکانیکی یول سوپورن ماشین آلما مسئله سی تعریفلنیب دیر، البته شورانین تخصصی کمیسیونلارینین راضیلیغی ایله بو سایی آرتدیریلا بیلر.
او شهرین خطرلی نقطه‌لرینی تاپماق و بو نقطه‌لرده اولان تهلوکه‌لی مانع‌لری آرادان قالدیرماق حاقّیندا خبر وئردی.
تبریز بلدیه رئیسی بو بلدیه اداره سینین مختلف دوورونده ایشچیلرین و اولومله نتیجه‌لنه‌ن حادثه لرینین آزالدیغینی و بیلدیریب و بئله دئییب: ۱۳۹۵-جی ایلدن ۱۴۰۰-جی ایله قدر ۲۴ ایشچی حیاتینی ایتیریب، آنجاق و بلدیه نین بو دوورونده بو سایی ۲ نفره دوشوب و بو دا تبریز شهری و شهری شوراسینین ایشچیلرین ایمنی مساله‌سینه اهمیت وئردیگینی گوستریر.
او تاکید ائدیب کی، تمیزلیک ایشچی قارداشلاریمیزین ایمنی و جانلاری بیزیم اوچون چوخ اهمیتلی‌دیر و بیز اینانیریق کی، ۲ اولومله نتیجه‌لنه‌ن قازا دا اولمازدی.
نظرات