تبریز بلدیه رئیسی، بلدیه مدیرلری ایله گوروش ده، دائمی گلیرلره داها آرتیق اهمیت وئریلمه سی، دقیق پلان ایله جاری خرجلرین کنترلینه و یاری قالان عمرانی ایشلره دقت ائدیلمه ضرورتینی بیلدیریب، دئدی: مودورلر گله‌جک ایلین بودجه‌سینی بئله تَرتیب ائتسینلر کی، تبریز شهرینین داواملی اینکیشافی و همشهری لرین راحتلیغی اوچون اویغون اولسون.
شهریار سایتینین خبرینه گوره، یعقوب هوشیار بو جلسه‌ده دائمی گلیرلره اونم وئرمه‌نین اهمیتینی وورغولادی و دئدی: دائمی گلیرلر بیزیم اساس اولویت‌لریمیزدن بیری‌دیر و اومورام منطقه و تشکیلات مدیرلری بو ایش اوچون کفایت قدر زامان و انرژی صرف ائتسینلر کی، تبریز داواملی اینکیشافا طرف حرکت ائتسین.
او علاوه ائتدی : دائمی گلیر قایناقلاری بلدیه یه، تبریزده یاشام کیفیتینی یاخشیلاششدیرماق اوچون اوزون مدتلی و گئنیش پروژه لر اجرا ائتمک ایمکانی وئریر.
بلدیه رئیسی، جاری خرجلرین کنترل ائدیلمه‌سینین لازیملیغینی وورغولادی و دئدی: جاری خرجلر منطقی اولاراق و بلدیه نین واقعی ایحتیاجلارینا اساساً پلانلاشدیریلمالیدیر و هر هانسی بیر سَببسیز آرتیم قبول ائدیلمز.
او دئدی: بعضی مدیرلر جاری خرجلری آزالتماقدا لازیمی دقت ائتمیرلر و بو مسئله قبول ائدیلمز.
هوشیار تاکید ائتدی: بلدیه مدیرلری بو مساله‌نی رعایت ائتمه‌زلرسه، خرجلری کنترل ائتمک اوچون بیر هیئت قورماغا مجبور اولاجاقیق. هر آی خرجلر دقیق بررسی ائدیلمه‌لی‌دیر و بیر نفر بو مساله‌یه رعایت ائتمه‌زسه قبول ائدیلمز و هئچ بیر شکیلده گوز یوممایاجاقیق.
تبریز بلدیه رئیسینین تاکید ائتدیگی اساس موضوعلارین بیری شهرین یاشیل ساحه‌سی و یاشاییش موحیطی ایدی، هوشیار مدیرلردن پارک و یاشیل ساحه‌لرین تاسیسینی باغلارین پارک‌لارا چئوریلمه‌سی اولویتینده گوندئم‌لرینده قرار وئرمه‌لرینی ایسته‌دی و دئدی: یاشیل ساحه همشهریلرین یاشام کیفیتینین مهم بیر حیصه‌سینی تامین ائدیر و بیز بو ساحه‌لری شهرین هر یئرینده کافی قدر اینکیشاف ائتدیرمک اوچون چالیشمالییق.
نظرات