شهریار سایتینین خبرینه گوره، یعقوب هوشیار تلویزیونون خبر کانالیندا دانیشاراق تبریز مترو پروژه‌سی‌نین گئدیشاتی حاقّیندا معلومات وئریب و دئییب : ۱۸ کیلومتر اوزونلوغوندا و ۱۸ ایستگاهدان عبارت اولان مترونون بیرینجی خطی، شهرین جنوب-شرقینده کی ائل گولودن جنوب-غربینده‌کی لاله محله‌سینه قدر خیدمت گوستریر.
او، ۱۴۰۱-جی ایلین اولیندن ایکی تی‌بی‌ام قورغوسونون ماشینینی فعّاللاشدیریلدیغینی و مترو قازما ایشلرینین سرعتلندیریلدیگینی بیلدیریب. بونونلا علاقه‌دار اولاراق، ایکینجی مترو خطینین غرب طرفیندن ۱۰ کیلومترلیک مسیرینین قازینتی ایشلری قورتارمیش و غرب تی‌بی امی‌نین چیخاریلماسی ایله یئر اوستو ایشلری باشلانماسینی بیلدیریب.
تبریز بلدیه رئیسی، ایکینجی مترو خطینین ۲۲.۴ کیلومتر اوزونلوغوندا و ۲۰ ایستگاهلا شهرین غربی‌نی بسیج میدانینا باغلایاجاغینی قید ائدرک دئییب: شرقی تی‌بی ام ین چیخاریلماسی ایله ایکینجی مترو خطینین قازینتی ایشلری گلن ایلین خرداد آییندا سونا چاتاجاق و همکارلاریمیزین چالیشمالاری نتیجه‌سینده، ۱۴۰۴-جو ایلین سونونا قدر ایکینجی مترو خطینین بیرینجی مرحله ایستگاهلاری ایشه دوشه جک.
یعقوب هوشیار، همچینین ایکینجی مترو خطی اوچون ۴۲۰ میلیون یورو فاینانسین سونلاشدیغینی وورغولاییب و بئله دئییب: بو فاینانسین الده ائدیلمه‌سی بو پروژه‌نین مالی تامینینده و تیکینتی ایشلرین سرعتلندیریلمه سینده چوخ بویوک رول اویناییر.
تبریز شهرداری، اوچونجو مترو خطینین ۹ کیلومترلیک قازینتی ایشلرینین بو ایلین بهمن آییندا باشلایاجاغینی خاطیرلاتدی و دئییب: بیرینجی مترو خطینین سهند و سبلان آدلاری ایله تانینان قازیجی قورغولاری (تی. بی. ام. ماشین لاری)، تبریز مسافر ترمینالینین چیخیش شفتینده تعمیر اولونوب و گلن آیدان باشلایاراق بو خطین قازینتی ایشلری ایکی تونئل شکیلینده باشلاناجاق.
او، همچینین مترو مسافرلرینی آرتیرماق اوچون بلدیه نین تشویقلریندن دانیشاراق دئییب کی، سون اوچ ایل ایچینده تبریز متروسونون مسافری ۱۵ مین نفردن گونده ۱۰۰ مین نفره چاتمیشدیر و ایکینجی مترو خطینین ایشه دوشمه‌سی ایله بو سای گونده ۴۰۰ مین نفره چاتاجاق.
نظرات