شهریار سایتینین خبرینه گوره، یعقوب هوشیار تلویزیون خبر کانالی ایله دانیشیقدا دئییب: شهر اطرافیندا یئرلشمه نین آرتماسی و غیرقانونی تیکینتی‌لر، بویوک شهرلرین جدی مسئله‌لری دیر و بونون اوچون ملی و محلی مقیاسدا موثّر تدبیرلرین گورۆلمه‌سی گرکلی دیر.
هوشیار، شهر حاشیه سینده یاشایانلار حاقیندا قانونلارین دَییشدیریلمه‌سینین ضرورتی باره‌ده دئییب: “تاسفله ، شهرلرده اجرا اولان هر مثبت ایش بو مسئله نین توسعه سی سببیندن نتیجه‌سیز قالیر و بو مسئله نین یاییلماسینین قارشی‌سینی آلمق اوچون موثّر و جامع قانونلارا احتیاج وار.”
او تبریزده تقریباً ۵۰۰ هکتار حاشیه منطقه‌سی اولدوغونو و بو منطقه‌لرده ۱۲۰ مین نفرین یاشادیغینی بیلدیریب. بو همشهریلر شهری خدمت و آبادلیقلاردان بهره آپارسالاردا، زلزله، سیل و یانغین کیمی حادثه‌لر زامانی او منطقه لره ایمداد و خدمت یئتیرمک چوخ چتین اولاجاق.
هوشیار، بلدیه نین ائتدیگی ایشلره ایشاره ائدیب و تبریزین ان اونملی پروژه‌لریندن بیرینین حاشیه منطقه‌لرده شهریین یئنی‌دن قورولماسی اولدوغونو دئییب. او، شهید آیت‌الله آل‌هاشم مسیرینین اولکه‌نین ان بویوک شهریین یئنی‌دن قورولما پروژه‌سی اولدوغونو و بو پروژه‌نین بهمن آیینین سونونا قدر ایشله باشلایاجاغینی بیلدیریب. بو پروژه، منطقه ده داها یاخشی خدمت گوسترمک و حاشیه منطقه‌لری گوجلَندیرمک مقصدیله حیاتا کئچیریلیب.
نظرات