شهریار سایتینین خبرینه گوره، تبریز مدنیت هفته‌سی تدبیرینین خبر اوْتوروموندا امیر نصیربیگی دئدی: تبریز مدنیت هفته‌سی ۲۲-دن ۲۹ بهمنه قدر عینی زاماندا ایکی بویوک شهر تبریز و تهراندا کئچیریله‌جک، ائله کی تهراندا بو تدبیر والیلیگین رهبرلیگی و تبریز بلدیه‌سی‌نین دبیری اولماسی ایله کئچیریله‌جک و تبریزده ده بلدیه‌نین اون بولگه‌سی‌نین، ایلگیلی تشکیلاتلارین و سایر ایجرایی ارقانلارین ایشتیراکی ایله کئچیریله‌جک.
تبریزین کیملیگینی و تاریخینی تانیتماغا تمرکز
نصیربیگی بو تدبیرین اونمینی و بو بویوک شهرین ایمکانلارینی تانیتماغینین اهمیتینی وورغولایاراق دئدی: تبریز مدنیت هفته‌سی‌نین کئچیریلمه‌سینده هدف، بو شهرین و اونون بوتون ایمکانلارینین میللی سویه‌ده لایقجه تانیتدیریلماسیدیر. سعی ائدیریک کی توریزم، مدنیت، صنعت و سرمایه‌قویما محورلرینه تمرکز ائتمکله، تبریزین داها یاخشی تانینماسی زمینه‌سینی یاراداق. شرقی آذربایجان اوستانی اولکه‌ده توریستی مکانلار باخیمیندان قاباقجیل‌دیر و تبریز ده بو ساحه‌ده اوزل یئره صاحیب‌دیر.
او داوام ائتدی: عالی مرتبه‌لی رهبر ده دفعه‌لرله تبریزین بویوکلویوندن یاد ائدیب و بو دا بو شهری داها یاخشی تانیتماق اوچون مسئولیتیمیزی ایکی‌قات ائدیر.
تهراندا گئنیش سرگیلرین کئچیریلمه‌سی
تبریز بلدیه‌سی‌نین مدنی اجتماعی تشکیلاتی‌نین باشقانی داوامیندا بو تدبیرین سرگی بولمه‌لرینه ایشاره ائده‌رک دئدی: تهراندا نئچه بویوک سرگی کئچیریله‌جک کی او جمله‌دن، بوستان گفت‌وگو سرگی مجتمعینده تبریزین سوغاتی، قورو یئمیشلری، ال ایشلری و مدنی میراثی‌نین سرگیسی قورولاجاق‌دیر.
امیر نصیربیگی داوام ائده‌رک دئدی: تهرانین لاله پارکی ده ال ایشلری سرگیسینه و نئچه مدنی اجتماعی و هنری پروقراما ائو صاحب‌لیگی ائده‌جک، ائله کی شرقی آذربایجان اوستانیندا ال ایشلری ساحه‌سینده ۱۳۹ فعال بولمه صاحیبی‌یک کی اونلارین سئچیلمیش اثرلری بو سرگیده نوماییشه قویولاجاق‌دیر.
نصیربیگی دئدی: ایرانین صنعتکارلار ائوی رساملیق (نگارگری) توپلانتی‌لارینی، تبریزلی رژیسورلار (فیلمساز) اثرلرینه بیر باخیشی و شعر، کیتاب و داستان ساحه‌سینده تخصصی اوْتوروملاری کئچیره‌جک.
او بو تدبیرین هدفینین تبریزین بوتون طرفلی ایمکانلارینی تانیتماق اولدوغونو سویله‌یه‌رک دئدی: تهرانین ارسباران مدنیت‌سارایی دا تبریزلی صنعتکارلارین خطاطلیق، عکس و هنری رساملیق سرگیلرینه ائو صاحب‌لیگی ائده‌جک‌دیر.
نظرات