شهریار سایتینین خبرینه گوره، بو توپلانتی دا تبریزین اسلامی شورا عوضوسو حکیمه غفوری، تهران بلدیه رئیسینین مشاوری و خانیملار و عائله ایشلری مدیری مریم اردبیلی، پرفسور سودابه داوران و بیر نئچه تبریزلی و تهرانی خانیملارین حضورو ایله، ایران اسلامی جامعه‌سینده خانیملارین وضعیتی و موفقیت‌لره چاتماق یوللاری دانیشیغا قویولدو.
حکیمه غفوری اوز نوطقوندا تبریزین مدنیت هفته‌سی‌نین تهراندا کئچیریلمه‌سیندن سئونمه سینی بیان ائدیب دئدی: "مدنیت بو گونکو دونیادا اینسانلار آراسیندا ان بویوک کورپودور و بو مدنیت هفته‌نین کئچیریلمه‌سی، ایکی بویوک شهریمیز آراسیندا مدنی و هنری تجربه‌لرین مبادله‌سی ایله ترقّی یوللارینی آچار."
او داوام ائدیب دئدی: "شک‌سیز، بو مدنی رویدادین برنامه‌لاریندا خانیملارین اهمیّتلی رولو وار و بو، خانیملارین مدیریتی، ایقتیصادی و اجتماعی ساحه‌لرده تاثیرینی عکس ائتدیریر."
شورا عوضوسو وورغولایاراق دئدی: "بو جمعیت‌ده و قیمتلی قوناقلارین حضوروندا یئنیدن تبریزدن و اونون عظمتی و تاریخیندن دانیشیغیمیزدان سئوینیریک. تبریزین یوکسک مدنیت و اینجه صنعتینی تهرانلی هم‌وطنلریمیزه تقدیم ائتمک‌دن فخیرلنیریک."
مریم اردبیلی، تهران بلدیه رئیسینین مشاوری و خانیملار و عائله ایشلری مدیری ده، تبریزین ایران‌داکی یئرینه ایشاره ائدیب دئدی: "تاریخین هر هانسی نقطه‌سینده دایانساق، گوروروک کی تبریز و اونون غیور خالقی همیشه حماسه یارادمیشدیر."
او آرتیردی: "تبریزلی ائللر هر زامان موختلیف ساحه‌لرده موفق اولوبلارسا، بو، تبریزلی عاییله‌لی، صبور و مدبّر خانیملارین حضورونون برکتی‌له اولوبدور."
تهران بلدیه رئیسینین مشاوری تصریح ائدیب دئدی: "بوگون ده تبریزلی خانیملارین تدبیر و تعقّلی سایه‌سینده عائله‌لرین چارچوْوو داها دا محکملنیر و بو مقدس کانوندا خلل یارانماز."
توپلانتینین باشقا بیر بولومونده، خانیملار اوز موفقیت یوللارینداکی تجربه‌لریندن دانیشاراق، مراسم ده حاضر اولان قوناق لار آراسیندا صمیمی بیر جوْ یاراتدیلار.
برنامه‌نین بیر بولومونده ایماژ موسیقی قروپو آذربایجان موسیقی‌لری اجرا ائتدی.
بو توپلانتی، اوردا حاضر اولان خانیملارین تقدیر ائدیلمه‌سی ایله سونا چاتدی.
نظرات