تبریز رومان گئجه‌سی"، مدنیت هفته‌نین ان گورکملی برنامه‌لاریندان بیری اولاراق، تاریخ، مدنیت و ادبیاتین بو قدیم شهرین رومان یازارلیغی واسطه‌سی‌له تانیدیلماسی اوچون بیر فرصت یاراتدی.
رومان چرچیوه‌سینده تبریزین روایتی
حسن کرمی قراملکی، تبریزین آدلیم یازاری و ۱۳۹۷-جی ایلین "کیتاب ایلی" و "جلال آل احمد ادبی جایزه‌سی"نین قازانانی (رومانی "رکاب‌زنان در پی شمس" اوچون)، بو جلسه‌ده اثرلرینی یاراتما یولوندا قارشیلاشدیغی چتینلیکلردن دانیشدی. او، یئنی رومانینین اونجه‌کی اثرلریندن فرقلرینی گوستره رک، روایت ائتمه‌نین اوزونه مخصوص تکنیک‌لری و روشلری‌له باغلی دانیشدی.
اونون یانیندا، فیلم و سینما ساحه‌سینده آدلیم بیر صنعتکار اولان حسین پورستار، "گم شهر" رومانی‌یلا یازیچیلیق ساحه‌سینده یئنی بیر تجربه‌یه امضا آتمیش و ائله‌جه بو ایل جلال آل احمد ادبی جایزه‌سی یاریشیندا بو رومان اوچون جایزه قازانمیشدی. او، تبریزده رومان یازارلیغینین تاریخی پروسه‌سینی تحلیل‌له‌ییب، بو یولو دورد دوره‌یه بولدو و هر دوورون خصوصیتلرینی محتوا و روایت قورولوشو باخیمیندان ایضاح ائتدی.
یئنی اثرلرین تانیدیلماسی؛ دیل و هویت آراسیندا کورپو
بو گئجه‌نین ان ماراقلی حیصه‌لریندن بیری، حسن کرمی قراملکینین "آزغین" و "سفری به اعماق جاودانگی" آدلی ایکی یئنی رومانینین تانیدیلماسی ایدی. بو اثرلر، تورکجه و فارسجا یازیلمیشدی و یئرلی هویت‌له میللی ادبیات آراسیندا کورپو رولو اویناییردی. کرمی، دانیشیقلارینین بیر حیصه‌سینده، آنا دیلینین رومان یازارلیغی‌ندا اهمیتی‌ندن و تبریزین محلی ادبیاتین قورویوب یایماداکی رولوندن دانیشدی.
تبریز؛ ایران رومان یازارلیغینین منشایی
ایرانین داستان ادبیاتی تاریخی، تبریزین آدینی رومان یازارلیغینین بئشیگی اولاراق فخری‌له یاد ائدیر. میرزا فتحعلی آخوندزاده، ایلک ایران رومانی اولان "ستارگان فریب‌خورده"نی یازاراق، نه‌تنها اولکه‌ده بو ادبی جریانین باشلانغیجی اولدو، بلکه اونون سونراکی اون‌ایللرده اینکیشافینادا زمینه‌یارادان اولدو. او زامان‌دان بو یانا، تبریز، ادبیاتی گوجلو قلملری‌له زنگینلشدیرن یازارلارین دوغما یئری اولوب.
تبریزین آدلیم یازارلاری؛ جامیعه‌نین گوزگوسو
اجتماعی داستانلارین بی‌نظیر یازاری اولان غلامحسین ساعدی‌دن ("عزاداران بیل"له بیر کند توپلومونون یارالارینی روایت ائدن)دن، "پرنده من" و "ترلان"لا معاصر جامیعه‌ده ایرانلی قادینین ناراحاتلیقلارینی تصویر ائدن فریبا وفی‌یه‌دک، تبریز ادبیاتا همیشه سیلینمز آدلار تقدیم ائدیب. محمدسعید اردوبادی ده "تبریز مه‌آلود" تاریخی رومانی‌یلا مشروطه اینقیلابی دونمینده بیر عاشقانه روایت ائدیب و بو شهرین تاریخینین بیر حیصه‌سینی ابدی‌لشدیردی.
تبریز رومانلارینین خصوصیتلری؛ رئالیسم‌دن محلی‌چیلیگه
تبریز رومانلاری، تاریخ، مدنیت و بو بولگه‌نین خالقی‌نین حیاتینین آینه‌سیدیر. روایتده رئالیزم، گونده‌لیک حیاتین تفصیللرینه دیقّت، قومی و دیل هویتینه یاناشما و تاریخی و اجتماعی دییشیکلیکلرین عکس‌سوژمه‌سی، بو اثرلرین ان گورکملی خصوصیتلری‌دیر. تبریز یازارلاری، نه‌تنها داستان یازمیر، بلکیه تاریخی یازیر و مدنیتی قورویور.
سونوج؛ تبریز ادبیاتی، سیلینمز بیر خزینه
"تبریز رومانی گئجه‌سی تهراندا"، یالنیز بیر مدنی برنامه دئییلدی؛ بلکه، ایرانین ادبی اینقیلابلارینین قلب‌ینده دایانان بیر شهرین زنگین ادبیاتینا بیر احترام ایدی. بو حادثه، تبریزین یالنیز سیاست و تاریخ‌ده دئییل، بلکه ادبیات و مدنیت‌ده ده دییشیل‌مز بیر یئری اولدوغونو و ایران ادبیاتینین ان اهمیتلی مرکزلریندن بیری اولاراق یاراتماق‌دا داوام ائتدیگینی خاطیرلادی.
نظرات