حافظ‌زاده "شهریار" سایتی ایله دانیشیق دا بیلدیردی: "تبریز بلدیه‌سینین خبر فعالیتی بو گونه دک ۵ دیلده (فارسجا، آذربایجان تورکجه‌سی، اینگیلیسجه، فرانسه‌جه و تورکیه تورکجه‌سی) دیللرینده یاییلیر. یاخین گونلرده روس و عرب دیللری ده بونا علاوه اولوناجاق."
اونون سوزلرینه گوره، بلدیه‌نین خبرلرینی دونیانین جانلی دیللرینده یاییملاماق‌ین اساس مقصدی، تبریزین قارداش شهرلری‌له و دونیانین دیگر شهرلری‌له مراجعتلری آرتیرماقدیر. حافظ زاده بونو دا قئید ائتدی: "تبریزین ۹ شهرله قارداشلیق موناسیبتلری و ایکی طرفلی همکاری‌لارین اینکیشافینین ضرورتی‌نی نظره آلاراق، شهرداری‌نین وب سایتی ۷ جانلی دیله گئنیشلندیریلیر."
حافظ زاده بوندان علاوه اولاراق، تبریزین و شهری مدیریتین چالیشمالارینین دونیانین جانلی دیللرینده تانیدیلماسینی، شهری دیپلماسی و بو بویوک شهرله قارداش شهرلر آراسیندا ایکی طرفلی مراجعتلرین اینکیشافینین بیر حیصه‌سی اولاراق قئید ائتدی.
اونون سوزلرینه گوره، "بیز تبریزین قارداش شهرلرینین رسمی دیللرینی بلدیه‌نین خبر پورتالینا آرتیرماق و بو قدیم و تاریخی شهرین دوغرو تانیدیلماسینی تامین ائتمک اوچون چالیشیریق."
قئید ائدک کی، تبریز بلدیه‌سینین خبر فعالیتی فارسجا، اینگیلیسجه آذربایجان تورکجه‌سی، تورکیه تورکجه‌سی و فرانسه‌جه دیللرینده آشاغیداکی لینکلر واسطه‌سی‌له ایزله‌نیله بیلر:
- فارسجا حیصه‌سی : https://www.shahryarnews.net/
- آذربایجان تورکجه‌سی حیصه‌سی : https://az.tabriz.ir/
- تورکیه تورکجه‌سی حیصه‌سی : https://tr.tabriz.ir/
- اینگیلیسجه حیصه‌سی : https://en.tabriz.ir/
- فرانسه‌جه حیصه‌سی : https://fr.tabriz.ir/
نظرات