شهریار سایتینین خبرینه گوره، یعقوب هوشیار دئدی: بعضی ساحه‌لرده آرزولانان استانداردلاردان گوزله‌گورلن بیر فاصله وار، آمّا بوگونکو بلدیه‌نین فعالیتی اوچ ایل اول‌کی وضعیت ایله موقاییسه ائدیله‌بیلمز.
هوشیار سون ایللرده شهرین آماری لارینا اشاره ائده‌رک، ایدمان ساحه‌سینی اساس چتینلیکلردن بیری اولاراق آدلاندیریب و دئدی: بئشینجی شورا دوورونده، ایدمان تشکیلاتی داغیدیلدی و دوردونجو شورا دوورونون سونوندا فعال اولان ۲۰-دن چوْخ میلّی و بین‌المللی تیم بیردن‌بیره یوخ اولدو. بوگون ایلک آددیمیمیز ایدمان تشکیلاتینی یئنیدن قورماق و تحصیل و حرفه‌ای استعداد آختارماغا دیقّت‌چکمیمیزدیر.
هوشیار، بلدیه‌نین ایدمان ساحه‌سینده‌کی باشاریلارینی بیلدیره رک دئدی: تبریز ایکینجی ایل اولاراق ایدمانین عمومی ساحه‌سینده اولکه‌ده بیرینجی یئرینی توتدو. بوندان علاوه، ۷۵ ایدمان پروژه‌سی یا تاماملاندی یا دا ۸۰ % فیزیکی توسعه سی وار و بونلارین آز توسعه‌لی منطقه‌لرده قورولماسینا دیقّت ائدیریک.
او، ورزشین توسعه سی ساحه‌سینده تبریزین اولکه‌ده بیرینجی یئری توتدوغونا اشاره ائدیب، بو ایشین، تبریز اوچون بویوک بیر فخراولماسینی دئدی
تبریز بلدیه رئیسی، سوزونون بیر حیصه‌سینده تعلیم ساحه‌سینده‌کی فعالیتلره اشاره ائدیب دئدی: اوشاقلاردا استعدادآختارما ساحه‌سینده موثّر آدیملار آتیلدی و بو پروسه گله‌جک ایلده داها دا گوجلو داوام ائده‌جک.
او، بو باره‌ده دئدی: همشهری لر، بلدیه‌نین فعالیتلرینین تفصیللریندن خبردار اولمالیدیر و مئدیا و رسانه بو ساحه‌ده کلیدی رول اویناییر.
هوشیار سوزلرینین سونوندا بیلدیردی: تبریز آرزولانان نقطه‌یه چاتماق اوچون همشهری لرین و تشکیلاتلارین گئنیش مشارکتینه احتیاجیمیز وار. گله‌جک ایلی شهری خیدمتلرده تحول ایلی اولاراق هدف توتموشوق.
نظرات