بلدییه رئیسی، شهیدلرین خاطیره‌سینی احتراملا یاد ائده رک، "شهید عاییله‌لری میلّتین گوز چراغیدیر" دئدی و بوتون میلّتین سککیز ایل مقدس مودافیعه‌نین قیمتلی شهیدلرینه و اونلارین یادگارلارینا بورجلو اولدوغونو تصریح ائتدی.
هوشیار، شهید عاییله‌لرینین جامعه ده کی یوکسک مقامینی وورغولایاراق، "تبریز شهری مدیریتی، گنج نسل‌ه هر بیر شهیدین عالی‌مقامینی تانیتماق و اونلارین عاییله‌لرینی احتراملا یاد ائتمک اۆچون بوتون ایمکانلاریندان فایدالاناجاقلارینی" دئدی.
تبریزین بلدیه رئیسی، "من و شورانین عوضولری هر هفته شهید عاییله‌لرینین ائولرینده حاضر اولوروق. بلدیه‌نین دیگر مسئوللاری دا موظف‌دیر کی، دایمی و هفته‌لیک اولاراق شهید عاییله‌لرینی زیارت ائده‌رک اونلارین وضعیتلری ایله ماراقلانسینلار" دئدی.
او، بو گوروشلرین، اسلام و عزیز وطنی اۆچون جانلارینی فدا ائدنلرین خاطیره‌سینی یاشاتماق اۆچون بیر فرصت اولدوغونو بیلدیره رک، "شهیدلرین یادی‌نی احتراملا ساخلماق و اونلارین یولونو داوام ائتدیرمک، هم شرعی، هم ده میلّی بیر وظیفه‌دیر" دئدی.
گوروشلرین سونوندا، بلدیه رئیسی یعقوب هوشیار، عالی‌مقام شهیدلر "مرتضی اعلائی اسفهلانی" و "راشد خاکپاکی"نین عاییله‌لریندن تقدیر ائده رک، اونلارا یادبود لوح‌لری تقدیم ائتدی.
شهید مرتضی اعلائی اسفهلانی: ۱۴ اسفند ۱۳۴۶-جی ایل تبریزده دوغولموش و ۲۱ تیر ۱۳۶۷-جی ایل مرصاد عملیاتیندا شهادته چاتمیشدیر.
شهید راشد خاکپاکی: ۱۴ خرداد ۱۳۴۶-جی ایل تبریزده دوغولموش و ۲۱ بهمن ۱۳۶۴-جو ایل والفجر ۸ عملیاتیندا شهادت شرفینه نایل اولموشدور.
نظرات