شهریار سایتینین خبرینده وئریلن معلوماتا گوره، "سیزجه، غیر مجاز و قانوندان کنار تیکینتی (ساخت و ساز) عامللری ایله نیجه رفتار اولونمالیدیر؟
آ) جرم حساب ائدیلیب، قانونی جازا تطبیق اولونسون
ب) شهرلر اوچون قانوندان کنار تیکینتی لازیمدیر
ج) ییخیلماسی کافی‌دیر"
سواللاری ایله کئچیریلمیش بو سورغویا ۳۳,۵۷۴ نفر قاتیلدی.
نتیجه‌لره گوره، همشهریلرین ۵۵%-ی "جرم حساب ائدیلیب، قانونی جازا تطبیق اولونسون" (آ سئچیمی)، ۱۷%-ی "شهرلر اوچون قانوندان کنار تیکی‌نت لازیمدیر" (ب سئچیمی)، و ۲۸%-ی ایسه "ییخیلماسی کافی‌دیر" (ج سئچیمی) ینی سئچیبلر.
بو سورغو نصرنیوز، آذرانجمن، شهریار، یازاکو، شمس نیوز، عصر تبریز، عصر آذربایجان، تبریز بیدار، سون خبر، همشهری آذربایجان شرقی، تبریز جوان، تبریز آنلاین، تبریزیمیز، عصر آذربایجان، اخبار اول، بازتاب، آی نیوز، تبریز سیتی، آذر وطن، نگاه آذربایجان، تبریز سیاست، آوای تبریز، قلم پرس، احرار، دیزمار و اخبار فردا کیمی اینستاگرام و تلگرام صحیفه‌لرینده پاییلدی.
دونیادا هر شهر و اولکه‌نین اوز تیکینتی قانونلاری وار. غیر مجاز، استانداردسیز و قانوندان کنار تیکینتی اولدوغو حالدا، مسئول تشکیلاتلار بو مسئله‌یه مداخله ائتمکله وظیفه‌لیدیر. متخصصلره گوره، قانوندان کنار تیکینتی، قانون چرچیوه‌لرینی و مهندسی قایدالارینی گوز اونونه آلمایان، یا شهرداری و مهندسی ناظرلیکدن ایجازه‌سیز اولاراق تیکیلن بینالارا دئییلیر.
قانوندان کنار تیکینتی ، ایقتیصادی، اجتماعی، فرهنگی و فیزیکی جهتلردن تحلیل ائدیلمه‌لی بیر مسئله‌دیر. اما عملی اولاراق، بو تیکینتی لرین خطرلی و استانداردسیز اولماسی، یوللاردا ترافیک یارانماسی، دیگر شهروندلرین حاقلارینین پوزولماسی، شهرین گورونوشونون پیسله شمه‌سی و... کیمی منفی نتیجه‌لره یول آچیر.
نظرات